网站首页 注册会员 登陆论坛 搜索帖子 最新帖子 最热帖子 彩信频道
 
论坛首页歌尽桃花扇底风 → 当前帖子
 
题目:王无能的段子之一 回复: 5 浏览: 1112
^_^!
表情: 作者:linou 时间 2006-6-13 10:49:15 序号:370
 
  哭阿龙笃爷
王无能
(甲) 啊呀我个阿龙笃个好爷好亲人哪。想倷亲人我今朝哭死哭煞呒没用。倷亲人活勒浪格辰光我真威风。勿壳张弄仔格桶货色会就送终。格日仔搭小妹肚皮痛。倷亲人还要安慰小妹宽宽胸。我搭倷亲人商量养仔妮子叫阿龙。养仔囡唔叫阿凤。龙是龙来凤是凤谑。阿龙笃个好爷好亲人哪。
(乙) 啊呀我个亲人啊。想着侬亲人一场空。阿公阿婆还好弄。还有个挡麻子直头凶。一日到夜要竖面孔。口口声声说侬亲人勒浪小妹身浪送个终。我耶勿是好人呒末用。实在是争争吵吵别人家话我勿开通谑。有个闲话我当耳边风啊。
(甲) 啊呀阿龙笃个好爷好亲人哪。想倷亲人阿晓得老古说。天作孽来犹可活。自作孽来不可活。格注苦头倷讨来吃。夹忙头里弄仔实梗一桶好货色。倷一日到夜当俚粥饭吃。阿晓得倷亲人本钱一向勿足格。弄仔转来关门大吉。连我倒帐才吃牢靠谑。想想拨记耳光倷吃啊。
(乙) 啊呀我个亲人啊。亲人待我勿推板。拿我火坑里向救出来。巴望倪白头到老该。勿晓得末会棒打鸳鸯两分开。苦头吃仔交交关。格注苦头那能吃得来。怪侬自家面孔忒推板。长末长得来像牌门板。脚末小得像火腿粽子个一眼眼。屁股高得像个外国坟山谑。一跷跷到黄浦滩啊。
(甲) 啊呀我个阿龙笃个好爷好亲人哪。倷亲人从前勿曾嫌鄙我。阿壳张死子下来有人倒闲话多。倷亲人自家像煞勿肯闲话多。像倷比我勿见得漂亮得那哼多。阿晓得倷是青龙对过差勿多。据我看倷个注漂亮勿在乎。究竟倷吃口恐怕要勿及我。还有像仔水果滩里一只烂苹果。我看倷再像麻油店里一块臭乳腐谑。煞死还要嫌鄙我啊。
(乙) 啊呀我个亲人哪。侬亲人着生头里一走头。甩仔小妹勒里吃苦头。格挡麻子脾气臭丑。丑得像只老黄牛。碰碰闲话里向嵌骨头。个注苦头吃得几时好出头。现在交关朋友要转念头。做小妹勒浪个歇辰光待我好得来勿过头。格咾一律统统才回头。因为做仔个种事体将来拨人家话要勿出头。所以情愿吃苦头。恐怕换仔别人老早跟人走。做小妹心里一眼勿转格种瞎念头。倒是难过个夜里头谑。想想我望外要一走头啊。
(甲) 阿呀我个亲人啊。
(丙) 嗳侬勿要哭哉。啊呀我个亲伲子啊。把望侬是长寿如星君。快快活活过光阴。落里晓得着生头里会勿太平。白头发送侬个少年人。侬伲子嘞阳间路浪昏沉沉。要到阴间去散散心。侬末一去勿要紧。笃仔伲女人两个一日到夜哭勿停。闲话里向骨头嵌得呒淘成。大家勿肯来让人。一日到夜末骂山门。我看一个八两一个是半斤。劝倷阿好停一停,太太平平过光阴。勿要怪我脾气丑得呒淘成。倘然倷要勿领盆。我拿倷两家头赶出门。一个买进花烟门谑。一个嫁拨勒印度人啊。

滑稽百勿得
王无能
说起俚个新闻。啥个新闻。
格椿俚个新闻。大得正经。
大得正经。要算新闻。
勿大勿小。也是新闻。
小个事体。有点新闻。
勿大勿小。加二新闻。
到底唱点啥个新闻。连我自家才弄大勿清。
规规矩矩,唱点末啥新闻。
我说百勿得个事体。交关开心。奉劝诸位。静心听听。
我说人生世界浪。好人做勿得。
爷娘年纪大。千定养勿得。养勿得。
看见老太婆。膀子吊勿得。
讨仔家主婆。自家困勿得。
用仔奶婶婶。奶奶吃勿得。
吃起鸦片烟。烟枪拿勿得。
台上去唱戏。口是开勿得。
有点红眼睛。辣货搨勿得。
好吃点心哉。帐是惠勿得。
写起书信来。笔是拿勿得。
人家办喜事。倷锡箔送勿得。
汽车撞上来。千定让勿得。
屋里烧起来。救末救勿得。
别人讨家小。份头拆勿得。
打起电话来。倷号头拨勿得。
赌起铜钿来。铜钿带勿得。
咳嗽喉咙痒。胡椒吃勿得。
裁缝做衣裳。剪刀剪勿得。
肚皮撒起来。裤子脱勿得。
走过棺材店。便宜塌勿得。
吃起香烟来。嘴里含勿得。
要吃冰激凌。开水镶勿得。
要去坐火车。票子买勿得。
养起小囡来。倷老娘喊勿得。
人家死脱仔。恭喜说勿得。
混堂里淴浴。衣裳脱勿得。
要去当当头。事物带勿得。
倘然俚要去。阻是阻勿得。
困勒被头里。鞋子脱勿得。
倘然生毛病。药是吃勿得。
若是死下来。棺材买勿得。
看见陌生人。倷爹爹叫勿得。
要想养伲子。家小讨勿得。
要去做和尚。头发剃勿得。
咸菜肉丝汤。火油加勿得。
冷天冻煞人。衣裳着勿得。
倘然肚皮饿。饭是吃勿得。
有人开堂子。股份也吃勿得。
要去吃喜酒。人情送勿得。
看见叫化子。倷朋友轧勿得。
刷起牙齿来。牙粉用勿得。
做起鞋子来。底末配勿得。
一条油炸桧。囫囵吞勿得。
拉起胡琴来。弦线装勿得。
戴起眼睛来。玻璃用勿得。
碰着客气人。耳光打勿得。
要吃红烧肉。酱油加勿得。
家小轧姘头。奸是捉勿得。
要搨雪花膏。煤屑镶勿得。
真真是厌气。片子更买得。

表情: 作者:lin 时间 2006-6-15 0:02:28 序号:389
^_^!
回复内容:
 

著名滑稽演员

表情: 作者:linou 时间 2006-6-15 10:38:57 序号:391
^_^!
回复内容:
  王无能是上海滑稽的老前辈,唱堂会唱出一个剧种,也是一个异数!
“哭阿龙笃爷”是一种哭法,比另一种“哭妙根笃爷”更闹猛,因为这个段子有三个角色,两个老婆一个娘,用苏州方言哭来十分有腔调,后来滑稽界用这种调头抑扬顿挫地哭了不少人,成为常用哭调。
看看老的段子,可以看到旧时代的生活,也可理解那时人的心态,“滑稽百勿得”调侃了当时的社会,也调侃了道德,让人笑中体会人生的哲理!这个段子后来不见有人抄袭过,这也是让人寻味的!
表情: 作者:linou 时间 2006-7-1 22:15:54 序号:406
^_^!
回复内容:
  王无能∶
哭妙根笃爷

啊呀妙根笃好爷好亲人吓。
啊呀奴格亲人呀。
想倷亲人好良心。待我小妹实在恩。
恩是恩得来海样深。小妹嘴里说勿尽。
旧年奴身上有身孕。肚皮大得来呒淘成。
搭倷亲人商量养仔囡唔叫妙英。养仔俚格伲子叫妙根。
妙是妙来根是根谑。妙根笃格好爷好亲人哪。
啊呀奴格亲人呀。
并勿是小妹混沌沌。埋怨一声玉皇大帝弗该应。
为啥咾天时弄弗正。上半日热来下半日阴。
害得伲格小官人俚倷自家弗留心。冻出仔一场小毛病。
睏拉房里实在闷。登拉床上弗开心。
着生头里想着要吃苏州城里玄妙观前叶受和里干点心。陆稿荐里格酱蹄筋。
小妹听见急煞人。一只里格航船叫端正。
赶到苏州城里大包小包买端正。要要紧紧转家门。
来到屋里踏进大门推进房门梢起青纱帐子就叫啥格亲人倷勿答应。摸摸倷末牙齿咬得紧腾腾。
倷额角头上冰冰阴谑。阴得像一杯冰激凌吓。
啊呀亲人呀。为仔倷亲人痛伤心。
赶到苏州买点心。心急得来呒淘成。
要紧航船浪向弗留心。脚上一扳勃伦腾。
跌得奴头破血流淋汀谑。亲人吓。

(二段)
啊呀妙根笃格好爷好亲人哪。
想倷亲人从前活浪勒个辰光真威风。走起路来像一扇蓬。
立勒笃格地浪像一颗松。坐勒笃格凳浪像一只钟。睏勒笃床浪像一面弓。
个歇辰光呒吗用。喊仔倷来耶弗成功。
揿仔捺格头来倷脚要动。揿仔倷格脚来个头要动谑。板门浪向会硬蹦蹦。
啊呀妙根笃好爷好亲人哪。
想倷亲人从前活勒浪辰光几化出风头。现在想想倷真担忧。
有日仔末小妹立落格笃后门口。看见街上有人走。
壮是壮来瘦是瘦。长是长来矮是矮。
老是老来幼是幼。老老幼幼长长矮矮壮壮瘦瘦看来看去罗俚有伲妙根笃亲爷实梗出风头谑。亲人吓。啊呀亲人哪。
想倷亲人活勒浪格辰光出风头。死仔下来也勿丑。
板门浪向有风头。头浪向末红缨帽子拖须头。
身浪向末箭衣外套铜钮头。脚浪向三套云鞋外头套子一只斗。
茄力克香烟弗吃点仔个断命油盏头。新闻报弗看一日到夜独看格一张黄纸头谑。
亲人吓。

表情: 作者:老侬 时间 2006-11-19 19:04:34 序号:498
^_^!
回复内容:
  1920年时的王无能

表情: 作者:老侬 时间 2006-11-19 19:06:06 序号:499
^_^!
回复内容:
  早期香烟牌子上的王无能、钱无量、赵希希

 
表情
插入
上传
内容
  请注意:本论坛设置游客不能发帖子。回复帖子
Copyright © 2006-2008 *东方文献网* All Rights Reserved 【☆☆☆